Puñu n'altu,hipocresía,promeses populistes,prexubilaos a mamplén,mines zarraes.

Nel 75 aniversariu de la revolución d'ochobre'l 34,l'esperpentu anual de rodiezmo dame más vergoña que nunca.

"Grao acogerá el mayor fondo de poesía catalana fuera del dominio territorial de esta lengua",diz un titular d'Europa Press.

"Aún no es posible cifrar el número de volúmenes que se trasladarán, pero el representante de la Fundación adelantó que el fondo contará con los autores más destacados de toda la historia de la literatura catalana."

Perbona noticia,vamos tener a la vera de nós muncha más riqueza lliteraria de la que teníemos,pero esti asuntu fiede bastante por un detallín qu'a min polo menos ponme de mal humor:¿Esiste dalgo asina rellacionao cola llingua asturiana?

Paezme que toos sabemos la rempuesta...

Tá perbién que se fagan iniciatives d'esi tipu,nun digo que non,pero hai que caltener un equilibriu ente sofitar y potenciar lo nueso y conocer lo foriato.

N'asturies eso nun se cumple,sofítase y poténciase lo foriato y malapenes conocemos lo nueso.

"Sánchez Torre considera que "la poesía catalana es riquísima y cuenta con una calidad extraordinaria", si bien la mayor parte de sus autores no son muy conocidos fuera de sus fronteras lingüísticas."

Toi d'alcuerdu,aidemos a que se conozan otres cultures y otres lliteratures,pero ¿y qué pasa colo nueso?

Enantes d'entamar,tengo que dicir daqué:Soi otru de los que piensen que l'ocho de setiembre nun debería ser el Día de la Nación Asturiana.

Hai feches más afayadices pa esi día (Mayu sedr'ia'l meyor mes),y ello nun quita pa que nel "Día de Asturias" les fuercies nacionaliegues fagan actos vindicativos y combayones qu'abran los güeyos a los asturianos escontra un día que sirve p'afitar la condición de rexón/provincia que nos lleven imponiendo dende fai años.

De toes maneres,sigui siendo murnio ver cómo tolos años pasa lo mesmo,y caún cellebra la fecha pel so lláu;Andecha Astur cellebra la yá tardicional manifestación n'Uviéu,UNA cellebra la yá tradicional fartura  que camuda de sitiu cad añu,y URAS-PAS,qu'esti añu camuda d'escenariu y d'actos.

Gran error.

Nun deberíamos escaecer que'l bandu "provincialista" englóbase nuna sola fiesta,baxo'l paragües del gobiernu asturianu,ye dicir,ye un actu con sofitu y poder,demientres que lo que debería ser una alternativa fuerte,xunitaria y con puxu va quedar otra vegada más en tres actos aneudóticos,xusto lo que quieren los PSOE,PP y cía.

Asina lo plantego yo,como dos frentes,per un lláu'l "provincialista" y per otru lláu'l nacionalista.Dalgo simple,cenciello y que nun va muncho más allá de vindicar que somos una nación.

Si nun somos capaces de facer dalgo xunitario pa vindicar esi mensax tan cenciellu y que,na teoría,les tres fuercies sofiten,non sólo vamos salir perdiendo'l seutor nacionalista,tamién va siguir ganando l'otru seutor,siguirá comiendo'l pocu tarrén que tenemos.

Tolos años espero que'l siguiente tengamos actos xunitarios,y esti nun va ser menos.

Suañar sigui siendo de baldre...

Fai dalgo más de quince años conocimos l'escándalu:el gobiernu asturianu foi engañáu por un intermediariu que dicía tar unviáu pol bancu internacional saudí col envís de facer una refinería a la vera del Musel,invirtiendo 100.000 millones de pesetes.

Cuando too eso foi descubierto y viose que too yera un engañu,el presidente asturianu de la época,Rodriguez-Vigil (FSA-PSE),dimitió amosando razones de "dignidá política".

 Anguaño tamos nun escenariu que nun ye igual,pero que nos fai recordar aquellos fechos.

Güei tenemos unes obres d'ampliación del puertu del musel con un sobrecostu de más de 200 millones d'euros sobre un presupuestu d'unos 500 millones d'euros,amás del espfarrape mediuambiental que supón la obra.

Depués d'intentar engañar a la Xunión Europea,el principáu y el estáu (o lo que ye lo mesmo,nós col nuesu dineru) van tener que comese'l sobrecoste con pataques.

Lo ablucante del casu ye que una institución pública como'l principáu intentó facer un "puertomochu" a la Xunión Europea,ensin que se tomen responsabilidaes.

Nesti casu nun va haber dimisiones por "dignidá política" (nun la tienen),y los socios de gobiernu va siguir colo esquizofrenia crónica que caltienen dende fai tiempu:per un lláu usen a Valledor de mamporreru,pero nun dexen los puertinos nin los chiringuitos que los sos collacios de la izquierda plural tuvieron a bien dexá-yos.

"El Bloque por Asturies no formará parte de un gobierno regional en el que no se reconozca la oficialidad del asturiano"

Rafa Palacios,Voceru del Bloque por Asturies

Tornamos del parón veraniegu,y nesti tiempu,como yera d'esperar,nun hebo cambeos nel gobiernu d'asturies.La FSA sigui gobernando xunto a Izquierda Xunida,los verdes,y el partíu nacionalista "Bloque por Asturies".

Na teoría podemos dicir que'l gobiernu d'Areces tien al enemigu en casa,el nacionalismu,movimientu dende siempres belixerante con esti personaxe que nos gobierna dende va munchos años.

Pero la rialdá ye otra,y ye que vemos cómo hasta xente importante d'Izquierda Xunida (casu de Valledor) amosa más sentíu críticu col gobiernu asturianu que'l propiu Bloque,que sigui prefiriendo callar y traicionar la so ideoloxía con tal de que nun pelligre la so posición de poder -pequena,pero tienenla- nin un par de puestos nel gobiernu.

Quiciabes seya una bona estratexa pa ganar importancia,militancia y sonadía,pero ye una estratexa permala si nel futuru necesiten tirar de credibilidá,porque hasta agora lo único qu'amosaron ye que nun son creyibles.

Demientres ehí sigui'l señor Areces y el so séquitu de "socialistes",y siguirán demientres nun se construya una alternativa sólida y fiable al so caciquismu y anti-asturianismu.

Esa alternativa paez perlloñe d'algamase...

Infórmovos de que hasta'l mes de Setiembre nun habrá actualizaciones,asina que bon restu de branu pa toos/toes.

 A partir del mes de setiembre,cuando entame un nuevu añu futbolísticu,la TPA va retransmitir la "Champions League" xunto a TVE y a otres televisiones autonómiques.

Nun paez que tenga munchu sentíu que dos cadenes vayan retransmitir n'Asturies lo mesmo (y más siendo públiques),pero puede atopáse una utilidá en casu de que tengan ganes.

Voi poner un par d'exemplos:

IB3-TV autonómica de les Islles Baleares- retransmite la Fórmula 1,igual que lo fai La Sexta,pero hai un fechu que les distingue:la retransmisión de IB3 ye na llingua del llugar,demientres que la de La Sexta ye en Castellán.

TV3-TV autonómica de Catalunya-tamién retransmite les carreres de F1 xunto a La Sexta,y como nes Islles Baleares,TV3 fáilo na llingua del llugar,demientres que La Sexta fáilo en castellán.

Nel casu de la TPA,nun podemos esperar que narren los partíos na nuesa llingua,tá perclaro que nun lo van facer.

Polo tanto,la "Champions" na TPA nin tien sentíu,nin intenten atopálu los responsables de la cadena.En detalles como esos vese que los nuesos gobernantes tan a años lluz de los de otros llugares del estáu en temes como la llingua y la cultura propia.

Tamién amosa la poca visión de la xente de la cadena,porque un partíu narráu na nuesa llingua diba ganase un públicu determináu,demientres qu'en castellán van competir coles mesmes armes que TVE,y polo tanto,tienen les de perder.

"El Principado se gasta 700.000 euros para traducir su web al bable"

¿Titular de la páxina d'UPYD,del PP o de la FSA? Non

¿Titular de La Nueva España o La voz de Asturias? Non

Ye un titular del periódicu de baldre "20 minutos Asturies".

Nun voi entrar en si ta bien o mal gastar ese perres pa esi asuntu (eso pa otra vegada),pero ye un titular que fiede muncho y que,pa entamar,tien un erru de bultu.El titular afayaizu sedría "El Principado se gasta 700.000 euros para traducir su web al bable y al inglés".

Entós,¿por qué esi titular? Polo de tolos díes,ganes d'engochar y atacar a la nuesa llingua.

Esi periódicu paecía dalgo distintu al restu,paecía tener un tratu dalgo meyor pa cola nuesa llingua,y espublizaba selmanalmente una opinión de Carlos Suari,pero ya amosó la braera cara,que ye la mesma que'l restu d'espublizaciones:refugu y despreciu a la nuesa llingua.

Otru periódicu más pa esi llargu llistáu de medios "anti-llingua"...