Mañana tornen les actualizaciones depués de dellos problemes pa tener conexión.Esti tiempu fízose eternu,pero hai muncho que cuntar y mañana entamamos de nueu.

Por problemes téunicos nun actualizaré hasta'l mes de xunetu.

Salú!

Tol sofitu pa los collacios de Vesuvius na so llucha pa defender los sos puestos de trabayu.

 "Ye una evidencia de que la sociedá asturiana ta madura pa lo que diba ser la toma de conciencia de la identidá asturiana, pero esa madurez, si pasa munchu tiempu ensin que se-y dea salida política, apodrez. Ye'l riesgu que corremos. Creo que ye'l momentu pa tomar soluciones y que la sociedá asturiana ta madura p'asumiles pasu ente pasu."

Xosé Lluís Carmona

Los resultaos nun dexen dubies:una vegada más,el nacionalismu asturianu diose una nueva hostia eleutoral.UNA mum llegó a los 4.000 votos,y Andecha Astur quedóse en poco más de 2.000,resultaos enforma probetayos y,anque nun yeren d'esperar unos resultaos muncho meyores,nun dexa de desanimar que añu tres añu,elleición tres elleición,tamos igual o pior que la vegada anterior.

Yera d'esperar,teniendo en cuenta que'l nuesu espaciu elleutoral ye enforma ruín,y si encima lu dixebres,queda nunos resultaos vergoñosos,sobre too porque'l trabayu desendolcáu polos partíos políticos d'esti ámbitu nacionalista merez,na mio opinión,unos resultaos meyores.

Nun val dicir qu'hai qu'esperar a les elleiciones autonómiques pa ver la braera fuercia de los partíos nacionalistes.Ya son munches hosties siguíes,les suficientes como pa dase cuenta de que hai daqué que nun funciona y qu'hai que camudar dellos plantegamientos pa poder tornar al espoxigue.

Nun ye normal que fuercies como Europa de los pueblos,que ye una candidatura de nacionalistes periféricos que nun tienen nada que ver con asturies,saque pocos votos menos que los partíos nacionalistes asturianos.Pue tener munches interpretaciones,pero yo véolo como una señal de que n'asturies hai un seutor más o menos visible que nun cunta con un proyeutu políticu seriu,y que pasa desapercibíu elleición tres elleición,unos perdíos na mar de votantes "socialistes",otros na mar de votantes "populares",otros na charca de los "pseudo-asturianistes-d'izquierdes",y otros en fuercies polítiques que nun faen más qu'amosar la so marxinalidá.

Nun sé vosotros,pero a min paezme que ya tá bien de que'l nacionalismu asturianu tea na marxinalidá,pero,¿cómo salir d'ella?

Pa entamar,axuntando a esi espaciu qu'agora mesmo tá perdíu.A partir d'ehí,el camín ye llargu pero esperanzador.Ye más,podría dicise qu'entós habrá camín,porque agora mesmo,yo nun lu veo.

Quiciabes el camín tea atapecíu,quiciabes el camín güei nun esista,o quiciabes yo soi ún d'esos perdíos...

El nacionalismu asturianu nunca cuntó con voz nos principales medios de comunicación.Ye una rialdá que ta ehí y que,muncha xente,considera como ún de los males del nacionalismu asturianu,ún de los motivos polos qu'esta opción política nun espoxiga.

Ensin embargu,hai que ser realistes:ye normal que nun dean publicidá a partíos que saquen 3000-4000 votos,y mui pocos medios presten atención a partíos tan marxinales nel númberu de votos.Tampoco hai que ñegar que'l nacionalismu asturianu va tar siempres,en mayor o menor midida,censuráu nos grandes medios,pero de nós depende,en bona midida,el gráu de censura al que temos somorguiaos.

Sicasí,nun podemos perder de vista que l'apaición nos medios ye daqué perimportante pa llegar a la xente,pa que la xente conoza'l nacionalismu asturianu y les fuercies que lu componen,y pa ello,tamién ye necesaria la xuntanza.

L'apaición d'una fuercia nacionalista fuerte,activa y con puxu elleutoral diba facer que'l nuesu papel nos medios fuese más importante qu'anguaño;polo menos,eso sedría lo lóxico.

Sin dir muncho más lloñe,el Bloque por Asturies,pol fechu de tar con Izquierda Xunida,tien un papel nos medios que,ensin llegar al nivel de los tres grandes partíos,ye muncho mayor que'l papel d'UNA o Andecha Astur.

Estes dos organizaciones,a pesar de que seguramente son les fuercies estraparllamentaries más actives ,nun cunten con presencia nenguna nos medios,y esi ye un mal a iguar dientru de les nueses posibilidaes.

Na mio opinió,esta ye otra razón más pa puxar pola xuntanza:ganar n'importancia mediática y, polo tanto,en presencia.

http://polaxuntanza.webcindario.com/

Güei nun voi falar de nada,que tengo la boca enllena de chorizu...

Porque pieslló l'astilleru xixonés "Naval xixón".Una empresa menos,una fonte d'empleu menos,un dolor de tiesta menos pa los "socialistes" que sofiten esti pieslle,otru símbolu de la llucha obrera y de la llucha pola defensa de los puestos de trabayu que nun molestará más a los que caltienen el poder.

Güei ye un día soleyeru,pero más escuru que nunca pa min y pal mio país.

Anguaño n'asturies,el nacionalismu cunta con dellos escenarios nos que trabayar conxuntamente.Por exemplu,nel campu de la llucha escontra la represión y poles llibertaes,tenemos a Sofitu,marca baxo la cual s'axunta la mayoria del nacionalismu asturianu pa esos temes.Otru exemplu más nuevu ye la plataforma independentista ya republicana "Ensame República Asturiana",baxo la cual trabaya l'independentismu en dellos temes como'l refugu al rei o la vindicación de la república socialista asturiana.

Estes dos esperiencies puen calificase de mui positives,ya que gracies a elles el nacionalismu/independentismu asturianu ta trabayando con más fuercia ya ensin engarradielles de nengún tipu.El que quier sumar y aidar,fáilo,ya'l que non,trabaya pola so cuenta o queda en casa.

El nacionalismu tien asentaes unes bases perbones de xunidá y trabayu neses fasteres,y tien de ser un exemplu pal restu d'ámbitos de la nuesa sociedá.

Ensin embargu,nel tarrén nel que ye necesario sacar resultaos,o lo que ye lo mesmo,sumar cuantos más votos meyor pa asina tener más fuercia,poder facer más coses etc, ye nel que más dixebraos tamos.Esti tarrén nun ye otru que'l tarrén politicu.

Poro,nun paez tener munchu sentíu que tengamos xunidá d'aición en munchos ámbitos y,ensin embargu,nel ámbitu políticu,el más visible,nun la tengamos.

Cuando hebo xunidá (que nun fron munches vegaes),los resultaos respaldárenla con votos y representación institucional y,si esa xunidá nun s'hubiere frayao,agora mesmo a lo meyor teníemos representación na Xunta,anque eso ye muncho dicir y ye falar de coses que nun sabremos enxamás.

Asina que si tenemos xunidá nes fasteres antirrepresives,republicanes etc,¿por qué nun facer lo mesmo col tarrén políticu?

http://polaxuntanza.webcindario.com

Non,nun pongo esi títulu porque piense qu'hai que zarrar toles empreses d'Asturies y prexubilar a los sos trabayadores;Póngolo porque los trabayadores de Naval Xixón tan siendo unos lluchadores hasta casi el mesmu día del pieslle del astilleru.

Gracies a la so llucha lleven prolongando'l pieslle del astilleru dende va munchos años,lleven lluchando a la escontra de too y de toos:gobiernu del principáu,alcaldía de Xixón,dueños del astilleru etc con un únicu oxetivu:caltener el so puestu de trabayu en condiciones dignes.

Eso hai que tenelo perclaro:l'astilleru xixonés nun pieslla porque los trabayadores quieran,sinon porque nun dexaron otra opción tantu los dueños del astilleru como los dos sindicatos "mayoritarios",UXT y CC.OO,marxinando a CSI,el braeru representante de los trabayadores del naval,y que hasta'l caberu día ta siendo un dolor de tiesta pa los dirixentes.

Naval Xixón piesllará,pero la so llucha nun s'escaecerá enxamás.Nestos tiempos d'EREs y despidos masivos son un exemplu de cómo lluchar pa caltener el puestu de trabayu faciendo lo que seya pa ello.

Nun ye muncho (más bien ye nada),pero teo que dicir que yo nun escaeceré a esi hestóricu astilleru xixonés,y sobre too,nun escaeceré a los sos trabayadores.

Otru día,más :)