El movimientu de reivindicación llingüística consiguió va trenta años acutar un día del calendariu nel que la llingua asturiana sería la protagonista. Un día nel que destacamos el valor insustituíble del nuesu patrimoniu llingüísticu y la so importancia central na construcción del futuru d’Asturies. Un día nel que reivindicamos los mesmos derechos llingüísticos que disfruten cuantayá’l restu ciudadanos del Estáu.

En tou esti tiempu, venimos sufriendo una clase política acomodada nes instituciones, despreocupada, irresponsable y belixerante que vien faciendo tolo posible por anular cualquier mínimu avance na dignificación y normalización de la llingua asturiana. Sicasí, la sociedá civil vien dando muestres clares de qu’hai una mayoría amplia y plural que siente apreciu por esti idioma. Hai n’Asturies un movimientu de reivindicación llingüística que, col compromisu y la palabra, yá ye quien a consiguir avances a pesar de la oposición frontal de los que tienen el poder.

Nes últimes selmanes tuvimos buena prueba d’ello. La movilización ciudadana foi quien a dar vuelta a los intentos d’esclusión del asturianu na Escuela de Maxisteriu. Una mayoría amplísima de docentes y representantes d’alumnos non solo evitó la desapaición de les titulaciones de llingua asturiana sinón que foi quien a incorporales la vez primera dientro los nuevos planes d’estudiu.

Esi ye’l camín y per esi camín vamos siguir. A les puertes d’una nueva reforma del Estatutu d’Autonomía d’Asturies ye necesario dar otru pasu y llograr el reconocimientu del asturianu como llingua oficial.

Agora tenemos la palabra. El vienres 8 de mayu ye’l Día de les Lletres Asturianes, un día nel que queremos convidate a que participes na manifestación pola oficialidá de la llingua asturiana que va salir a les 19:00 de la Estación del Norte d’Uviéu.

AGORA TENEMOS LA PALABRA L’ASTURIANU LLINGUA OFICIAL.

Ye daqué que pue paecer lóxico,pero nun ye siempre asina:Munches vegaes,la solidaridá y el sofitu ente les llingües minorizaes del estáu  brilla pola so ausencia,y ente les llingües oficiales y les non oficiales,el casu ye más sangrante tovía.

Hasta fai bien poco,l'asturianu yera'l gran escaecíu dientru de los movimientos llingüisticos del estáu español,y en gran midida sigui siéndolo,pero nes selmanes caberes toi llevando una allegría pergrande por mor del movimientu vindicativu del catalán.

Reportaxes sobre'l movimientu llingüisiticu asturianu en distintos medios,como'l periódicu "Avui",tuvieron presentes estos díes,y agora salen con otru detalle perbonu:

La organización de la campaña El Catalán, la viniente llingua oficial de la XE  yá tien disponible n'asturianu'l formulariu na so ueb pa roblar el sofitu  a la oficalidá del catalán na Xunión Europea.

Son detalles pequenos,colos que nun vamos algamar la oficialidá,nin areces  va camudar d'opinión sobre l'asturianu,pero presta ver y saber que dende otros llugares sofiten la nuesa llucha y alcuérdense de nós.

Ye d'esperar que nun seya temporal,y que sigan teniéndonos presentes.Y si esa "vena" s'esparde a los vascos y los gallegos,muncho meyor.

¡L'ASTURIANU Y L'ARAGONÉS OFICIALES YÁ!

Xueves 14 mayu

19:00 hores Presentación oficial III Muestra Cultural Tolo d’Asturies

Conciertu Ignacio Alfayate + Filippo Gambeta + Xuan Nel Expósito + Alumnos Escuela Acurdión de la Escuela de Música Tradicional Reija de Llangréu

Inauguración Esposición Acurdión Tradicional

Inauguración cursos acurdión diatónicu de la Escuela de Música Tradicional Reija de Llangréu (Nivel mediu y superior)

(Centru la Cultura y la Llingua Asturiana Casa los Alberti, Ciañu)

Vienres 15 mayu

22:00 hores Conciertu

I LIGURIANI (Italia) + *LOS CIQUITRINOS + *LOS GATOS DEL FORNU

*(FACIENDO L’INDIO NA CAI, espectáculu presentación de los dicos Faciendo l’Indio-Los Ciquitrinos- y Na Cai- Los Gatos del Fornu)

Sábadu 16 mayu

12:00 hores Apertura Oficial Muestra Cultural TOLO D’ASTURIES

12:00 hores Banda Gaites Conceyu Llangréu

13:00 hores Conciertu HERMANOS VALLE ROSO

22:00 hores Conciertu

**XIDECES (BANDA GAITES LLACÍN + ARTISTES CONVIDAOS) + DAVID MUNNELLY BAND (Irlanda) + HERBAMORA

** (Más de 100 músicos nel escenariu, espectáculu qu’inclúi un pasucais previu dende El Parque Vieyu La Felguera hasta la Estación Central d’Autobuses de Llangréu)

Tol día: Mercáu tradicional d’artesanía y gastronomía

Feria del discu y el llibru n’asturianu

Folixa y baille pa toes/os con bandines tradicionales

Animación con grupos de baille y música tradicional

Talleres pa neñes y neños (animación, xuegos y deportes tradicionales, artesanía…)

Domingu 17 mayu

12:30 hores Conciertu Banda Música de Llangréu

13:30 hores Toná

18:00 hores Conciertu HÉCTOR BRAGA

19:00 hores Carta blanca a Tomás Zapico (Presentación del so discu y reinterpretación d’una escoyeta de temes del repertoriu d’esti músicu de La Güeria Urbiés a cargu d’acurdionistes modernos del altor de Marga Lorences, Nel Ordóñez, David Varela, Jose Manuel Tejedor y Marcos Alonso). Homenaxe a la tradición del acurdión, cola dirección de Xuan Nel Expósito y la collaboración y presentación de Xosé Antón Fernández “Ambás”

Tol día: Mercáu tradicional d’artesanía y gastronomía

Feria del discu y el llibru n’asturianu

Folixa y baille pa toes/os con bandines tradicionales

Animación con grupos de baille y música tradicional

Talleres pa neñes y neños (animación, xuegos y deportes tradicionales, artesanía…)

20:30 hores Clausura de la “III Muestra Cultural TOLO D’ASTURIES de LLANGRÉU”

Actividaes perinteresantes les que ufierta esta muestra cultural que cumple 3 ediciones (y que seyan munches más).

Güei pela mañana garré un periódicu d'esos que dan de baldre.Abrí la primer fueya,y quiciabes fuera porque a eses hores ún tá mediu tontu,pero lleí un titular que m'ablucó:

"L'estáu intervendrá Arcelor si nun llega a un alcuerdu sobre l'ERE"

¿L'estáu interviniendo Arcelor,faciéndola una empresa pública? Demasiao bono pa ser verdá.El braeru titular yera esti:

"L'estáu intervendrá n'Arcelor si nun llega a un alcuerdu sobre l'ERE"

Pero la verdá ye que dempués de ver la inutilidá del gobiernu asturianu y la so nula influencia na empresa más importante d'Asturies,cada vegada paez más claro que la decisión de privatizar totalmente lo que yera Ensidesa foi un erru pergrande,cuyes consecuencies tamos pagando y pagaremos durante munchos años.

Agora dirán que nun puen facer nada,pero la verdá ye que nel so momentu pudieron facelo too,y anque quisieran privatizar la empresa,lo sensato sedría conservar una participación,pero nun sólo n'Ensidesa,sinón que en toles empreses que foron públiques y que se privatizaron.

Lo suyo ye que continuaren siendo públiques,pero ya que les quisieron privatizar,¿qué menos que caltener ferramientes pa nun quedar col culu al aire nesti tipu de situaciones?

Y too esto por una lletra...

Ye daqué que m'entruga muncha xente de fuera d'Asturies,anque nun ye mui difícil algamar la rempuesta:Porque van a la gueta d'oxetivos distintos,ye más,quiciabes son dos movimientos antagónicos,per un lláu los defensores d'una España repubicana,y pel otru lláu,los partidarios d'una república asturiana independiente del estáu español.

*Entós,¿por qué surpriende tanto a la xente foriato la esistencia d'estos dos movimientos?

Na mio opinión esto ye porque'l movimientu republicanu asturianu dixebróse claramente del español fai mui pocu tiempu.Enantes ambos movimientos nun taben bien diferenciaos,ya'l predominante o,polo menos,l'únicu visible, yera l'español.

Pero la cosa tá camudando,el movimientu republicanu asturianu tá algamando pasín a pasín repercusión y fuercia,y tá comiendo tarrén a los movimientos españoles.Esto ye visto con nerviosismu por parte de los republicanos españoles,avezaos a nun tener a naide que retruque les sos idegues dientru'l republicanismu y a nun tener más "rivales" que los monárquicos.

*¿Hai posibilidá de collaboración ente ambos movimientos?

Yo creo que nun hai muncha.La única posibilidá ye que'l republicanismu español acepte que la república española seya un pasu previu a la dixebra d'Asturies;sinón,tamos nel conflitu de siempres:"independentismu escontra españolismu",seya republicanu o monárquicu.

Polo demás,les posibilidaes de collaboración son poques,ya que nun se coincide en munchos aspeutos,descontando'l refugu al rei.

En definitiva,ambos movimiento tiénen munchu camin per recorrer,pero la so dixebra paezme que ye positiva a la hora de dexar claro qu'hai dos postures republicanes n'asturies,colos sos oxetivos y la so muerganización.

Yera necesario acabar cola incompatible mestura d'asturines y tricolores nun mesmu llugar.

Gran perda pa la lliteratura la d'esta muyer que,per otru lláu,paezme que siempres tuvo infravalorada n'asturies.

Amás de ser una de les grandes de la lliteratura en castellán,dió la cara pola oficialidá de la llingua asturiana,amosando'l so compromisu pa cola nuesa cultura.

Una paisana con toles lletres