Votu útil nel asturianismu:¿esiste?
Nos años caberos fálase muncho d'esi fenómenu elleutoral nomáu votu útil.
Un bon exemplu foron les elleiciones estatales,onde xente d'esquierdes quenormalmente,nun votaríen al PSOE,ficiéronlo pa que'l PP nun ganare les elleiciones.
¿Esiste esi fenómenu dientro del movimientu asturianista?
Pa entamar,vamos definir qué ye eso d'asturianismu:yo considero asturianismu a los partíos nacionaliegos (AA,UNA,PAS,BA) y a dellos partíos rexonalistes,como'l casu d'URAS.Tamién podemos discutir si meter o non a Izquierda Xunida,porque en custión de fechos,ye nidio que nun pertenecen a esi seutor políticu,pero bona parte del so elleutoráu ye asturianista,asina que,préstenos o non,entra dientro d'esa pallabra tan ambigua.
Dicho esto,pasamos a analizar l'elleutoráu asturianista y el so comportamientu nos caberos años.
El votu útil básase na concentración del votu nuna opción política,según les posibilidaes de cada partíu d'algamar oxetivos:representación,gobiernu etc
Echando una güeyada al panorama de los caberos años ,descartamos casi al momentu a Andecha Astur y Unidá/UNA,ya que polos sos resultaos elleutorales ya'l so comportamientu n'otres elleiciones,les sos posibilidaes d'algamar representación yeren nules dende un entamu.
Ye más,yeren los oxetivos perfectos pa otros partíos que sí taben en condiciones de dir a la gueta d'esi votu útil.Falo,en primer llugar,d'IX-BA,que foi ensin tapuxos a la gueta del votu asturianista d'esquierdes,algamándolu en bona midida,y convirtiéndose nel referente elleutoral d'esa opción política,anque depués los fechos fagan ver que d'asturianistes,poco.
La entruga ye si esos votantes asturianistes d'izquierdes votaron a IX-BA porque sabíen que diba algamar representación.Pa min,bona parte fízolo por eso,por dá-y puxu a una fuercia politica que diba representar l'ideariu asturianista na Xunta xeneral del principáu.
En segundu llugar,atopamos la unión URAS-PAS.Nes sos primeres elleiciones xuntos,algamaron la metá de votos que sumando los sos votos cuando caún diba pel so lláu.polo tanto,nesti casu falar de votu útil ye mui atrevío.Más bien habría que falar de batacazu,anque de xuru que dalguna persona votó a esta fuercia porque,siendo realistes,tenía opciones d'entrar na Xunta Xeneral,anque nun foron a ello.
Visto lo visto,quiciabes podamos falar de votu util asturianista a pequena escala,y cuntando con que esi arcu politicu cunta con munches alternatives que dixebren l'espaciu.
¿Qué-vos paez?
Esbilla
del.icio.us
Pues yo lo que me paez ye que la teoría del votu útil que funcionaba hasta agora o morrió o ta dando les boquiaes. ¿Por qué?. Pues porque les urnes yá dexaron claro que del llau de les formaciones d'ámbitu asturianu nun va haber representación dala si se presenten por separao. Y nel casu d'IX xuega electoralmente a la baxa y dexó rescamplando qu'abandona cualquier propuesta asturianista nel mesmu momentu que dende'l PSOE los inviten a pactar.
Claro que almeyor tamos avanzando hacia l'afitamientu d'otra manera d'entender el votu útil: si se da una candidatura unitaria con posibilidaes d'algamar representación parllamentaria. La tán deseada por unos y tamién odiada por otros, xuntanza.
Pa min sí hebo votu útil,yo voté nes caberes elleiciones a URAS-PAS col enfotu de tener representación asturianista na Xunta.Quiciabes n'otra situación nun los votaría,pero el fechu de poder algamar representación fizome votalos.
Ye una esperiencia personal,pero caún tendrá la so opinión.
Sí, esiste'l votu útil. De fechu, toi seguru qu'abonda xente esmolecío por Asturies intentamos votar a lo que meyor paeza que vaya valir estratéxicamente.
Anque la mio filación política ta nel nacionalismu d'izquierda moderada, póngome a pensar y veo que, no que llevo de "vida votante", tengo votao:
- Coalición Asturiana (PAS y UNA)
- Partíu Asturianista
- Andecha Astur
- Izquierda Xunida/Bloque por Asturies
- Unión URAS/PAS
- Unidá
Lo que foi la costante, siempre, ye l'apaición de la sensación de tirar el votu al día/mes/añu siguiente de facelo.
Polo que cuntáis,el votu útil ye una realidá nel asturianismu,y como bien diz el xanu una bona manera d'exercer esi votu útil seya teniendo una fuercia con capacidá real y con futuros pa algamar resultaos.
saludos!