Pasín a pasu va consumiéndose la llexislatura y averámonos al gran momentu pa munchos:les elleiciones autonómiques.

Dientro poco los grandes partíos (FSA,PP) tendrán que dir escoyendo los sos cabezaleros pa diches elleiciones,una vegada más perimportantes pa estos dos partíos que sedrán los que aspiren al gobiernu del principáu.

Nel casu de la FSA paez qu'Areces nun se presentará otra vegada a les elleiciones,y Javier Fernández paez el gran candidatu pa sustituir a Tini.

Sobre'l papel sedría'l fin del arecismu,pero na realidá la llinia a siguir por Fernández sedrá de continuidá,y en dellos aspeutos como,por exemplu,el conflictu llingüisticu,taremos igual o pior,teniendo en cuenta que Fernández pertenez a esi tríu que completen Lastra y Gutiérrez,tres personaxes que nun atapecen en nengún momentu'l so refugu a la normalización de la nuesa llingua,y qu'anguaño son la retaguardia del arecismu.

Cambéos pa nun camudar.

Nel PP too ye muncho más escuro,porque anque nun principiu nun paez que Ovidio seya'l candidatu del partíu,nun hai que descartálu.De toes maneres si nun se presenta Ovidio,de xuru que fadrálo daquién de la so cuerda  (¿Aréstegui?).Paezme innecesario dicir lo que pasó nel caberu "congresu rexonal" del PP,y ú ta anguaño l'opositor d'Ovidio:fuera del PP.Con eso queda claro que la democracia interna ye una lleenda urbana dientro d'esi partíu.

Cambéos (si los hai) pa nun camudar.

Nel casu d'IX val más nun opinar.D'equí al 2011 pue pasar de too,hasta posibles escisiones o que xente de dellos seutores cole (falo principalmente del seutor asturianista encabezáu por valledor,anque güei esa posibilidá nun paez real).

Ye lo que nos espera nes elleiciones autonómiques que vendrán,cares nueves,nueva imaxe,mesmes polítiques,mesmes idegues,mesmes persones nel poder real de los partíos.

Más de lo mesmo.

Siempres nos quedará suañar col aire frescu de la xuntanza nacionaliega...