A la fin pasó l’asperáu 22-M ,esi día nel que díbemos ver lo qu’opina,en parte y dientru de les llimitaciones del sistema,el pueblu asturianu sobre la so clas política,los sos representantes -equí una de les llimitaciones cimeres-,y la verdá ye qu’hebo novedaes,si asina podemos llamar a l’apaición d’un PP con otru nome y un políticu “n’activu”-con periodu de barbechu incluyíu- dende la transición –otra llimitación:siempre les mesmes cares-. Ye verdá qu’esta vegada podía asperase daqué nuevo,amás de pola apaición de FAC,pol movimientu entamáu díes enantes en tol estáu,amosando’l descontentu pa col sistema y los sos gobernantes, y dalgo camudó; pa mal,pero eso ye otra hestoria.
A nivel xeneral,les autonómiques asturianes destaquen pola victoria de FAC con Cascos como cabezaleru. En primer llugar,ello ye una seña del descontentu xeneral pa col PSOE y les sos polítiques,dexándolos baxo mínimos nel nuesu país,lo mesmo que’l PP,que queda na metá. IX-LV caltuvo’l tipu,medró en porcentaxe de votos y beneficiose de la xostrapada xeneral del PSOE,más a nivel de conceyos que nes autonómiques,demientres qu’UpyD tuvo a piques d’enanchar el desastre p’Asturies y entrar na Xunta.
Paez nidio que la xente quería un cambiu,dalgo novedoso na política asturiana,y qu’esi elementu novedosu seya Cascos ye dalgo bien murnio: siempre los mesmos,les mesmes cares,sigles a vegaes distintes,siempres el mesmu despreciu p’Asturies y el so usu pa intereses personales y de partíu,siempres el PSOE caciquil na solombra o nel gobiernu,siempres el PP dimpuestu a vender la dignidá –si usen d’eso- pol poder.
Ye murnio,pero a fin de cuentes ye lo que quier un pueblu dormíu ya inmóvil,porque nun mos enquivoquemos: que de sópitu entre un partíu con 16 diputaos débese a la fusión d’elementos salíos de los otros partíos del réxime;saliéndose d’esi espaciu,nun hai sitiu pa nadie na Xunta Xeneral.Inmovilismu puru y duru,y decadencia,muncha decadencia.
Nos conceyos FAC sedrá clave en conceyos perimportantes como Uviéu,el PP pierde tarrén y el PSOE más de lo mesmo,en munchos casos a favor d’IX-LV (N’Illas,Mieres o L.lena,por exemplu,arrasaren,y en munchos casos merecidamente). Lo mesmo:FAC ye l’elementu “nuevu”,IX-LV medra,PSOE y PP faen lo que pueden.
Y a la fin aportamos a esi espaciu de nueso,el minoritariu,l’alternativu,esa mecigaya onde lo mesmo pues atopar a un cura qu’a un nazi de DN o FN,o una secta nomada UCE…Pero xusto enrriba -rozando- d’eses opciones hiperminoritaries tamos nós, “L’Asturianismu”,conviviendo con IDEAS,FDLI y LV-GV.
BA-UNA,asina a grandes rasgos,fracasó nel intentu; sacar poco más de 6.000 votos cuando s’aspiraba a algamar diputáu ye una fracasu,y más cuando a nivel de conceyos algamose namái conceyal en Carreño y L.lena,mas los tres d’Asturianistes por Nava. Insuficiente y decepcionante,eso si miramos les fríes y dures cifres,pero si miramos más fondo,nun pueo facer más que felicitalos: gran campaña con pocos medios,imaxinación y,sobre too,propuestes,con un programa elleutoral constructivu y completu.Colos sos peros,evidentemente,pero echábase de menos dalgo de propuesta ideolóxica nel nuesu movimientu,y BA-UNA,con esi programa,dio’l primer pasu. Entós,¿ú ta la pega?
Marxinación nos medios del réxime,en primer términu,y seguramente,en segundu términu,qu’entá nun hai capacidá p’aportar a les metes propuestes pa estes elleiciones.
La crítica que tengo que facer,nesti casu,ye la falta d’un apueste más decidíu por custiones como falar ensin complexos de qu’Asturies ye nación,usar asturines con estrella en público (esto ye secundario,pero simbólico) o definise más dientru d’esi espaciu abstractu de la esquierda.Entiendo que nun se faiga pa intentar ampliar l’espectru,pero los resultaos creo qu’amosen que nun paga la pena,o qu’hai que facelo con otres estratexes.
CA,pela so parte,con espectatives muncho más modestes,algamó un resultáu perdiscretu nes autonómiques (respecto a AA,partíu integráu en CA,pierden la metá de votos),demientres que nes elleiciones de conceyu pasó con nota Noreña,onde a la fin algamose conceyal.Nel restu de conceyos discretu resultáu, col CUPX bastante detrás de BA-UNA en Xixón y nel restu de conceyos.En resume,la conceyalía de Noreña salvó los muebles énte unos resultaos discretos.La disculpa:nun ye una opción eleutoralista nin con pretensiones,buscaba afitase de cara al futuru. Erros,los mesmos que podíemos garrá-y a AA,por exemplu la falta d’un documentu programáticu a lo BA-UNA.Non too ye trabayu de cai puru y duru,tamién hai que curiar otres coses.
URAS-PAS lleva la xostrapada más grande. Pierde 10.000 votos nes autonómiques y algama namái 2 conceyales nes municipales,perdiendo tola representación en Villaviciosa,onde teníen l’alcaldía. FAC foi la muerte elleutoral d’URAS-PAS,y agora toca plantegase’l futuru,que paez lloñe de siguir cola coalición. Toca ver tamién la utilidá d’esos llamaos “asturianistes” que colaron pa FAC,si sirven de dalgo a nivel de pesu ideolóxicu internu o colaron namái a pol puestín.
Otru datu a destacar ye la entrada d’AMI nel conceyu de Morcín,bona noticia pal asturianismu dientru d’esti ermu xeneral.
De les igües yá tendremos tiempu de falar,pero ye evidente qu’hai que reinventanos y arremangase toos y toes pa trabayar dende abaxo,dende lo poco algamao y calar p’arriba xuntos,ensin sectarismos,ensin partidismos ensin xacíu,con xenerosidá y,por qué non dicilo,con patriotismu. Trabayu de cai,trabayu ideolóxicu y trabayu organizativu dende una perspectiva común,lo cual nun tien que significar xuntances fulminantes y absolutes d’organizaciones,pero sí entendimientu y voluntá de camudar el nuesu panorama pasín a pasu.
Güei,nesti díi depués de la xostrapada xeneral,quería facer esti pequeñu repasu de lo que foi’l circu elleutoral y los sos resultaos,pero falaremos más fondero y en frío del NUESU futuru,y recalco’l nuesu porque esto ye custión de toos y toes,güei más que nunca,dexando partíos y rivalidaes de lláu,y tamien elleiciones,que son dalgo de muncha importancia pero nun son la fin del mundu nin de la nuesa llucha.
Ye tiempu de reflexonar y pensar en cómo facer les coses,pero toxs a una y al pie del cañón.
estihomeallorio 
Norabona pol anális. Sobre’l BA-UNA camiento como tú qu’esos resultaos son una decepción por tratar de vender ” non solo’l diputau, sinon el diputáu y la diputada”. Pero tamién ye ciertu qu’UNA-BA algamen el techu de la izquierda nacionaliega, anque con unos plantegamientos mui moderaos, y munches vegaes incoherentes y posibilistes. De toes formes la xente d’esa coalición trabayó MUNCHISIMU nestes selmanes, y hai que da-yos la norabona polos más de 6.000 votos algamaos, qu’anque paezca dececionante son munchos votos, el problema fueron les espectatives non reales que punxieron, anque de puertes p’adientru nun creyerenlas, ye lo que tien la política y les cites eleutorales.
D’otra miente, quiciabis Conceyu Abiertu nun se tea que presentar, a lo menos anguañu a les eleiciones a la Xunta Xeneral. Ye un alderique que merez ser tratáu nestos meses y selmanes que vienen darréu, y merez plena atención y responsabilidá. Lo que hai que tener claro ye que Conceyu Abiertu ye un apueste realista a nivel de Conceyu, y nel tarrén municipal la xente d’AA, Darréu y otres org. al empar qu’independientes entamaron esi camín y creo que ye’l más afayaizu, polo que replantegar la política nos conceyos pa con CA va ser complicáu y con razón, pues l’apueste ilusiona a muncha xente, ente ellxs al qu’escribe estes llinies. Perbona noticia’l conceyal de Noreña, pero tamién valoraría perpositivamente’l resultáu en Samartín del Rei Aurelio ( dientru cuatru años tien pinta de cayer conceyal, pues la xente d’ellí inspirame muncha confianza y tienen munchu amor al trabayu y el compromisu) y Grau. En Grau enxamás hebo nada, y ta perenriba l’ún per cientu, un resultáu granible y un nuevu grupu homanu bien constituyíu trabayando dende la izquierda patriota. Los otros conceyos resultaos irregulares, destacando el baxón de Llangréu ( a lo menos respeuto a AA ) y el probeyatu resultáu de CUPX ( nun se desplica mui bien). En Mieres foi dificil facer candidatura, pero hai que tener confianza na poca xente que pel momentu integró’l proyeutu, pues tien capacidá de sobra.
Del PAS dicir qu’a lo meyor foi lo meyor que-y pasó al nacionalismu. Xuan Xosé (un paisanu y un patriota) tendría que replantegase lo de tornar a ser cabezaleru, y l’URAS fuxirá d’ehí. Esperemos, y asina’l PAS tornará a convertise nun partíu nacionalista, anque dende una perspectiva marxista nun seya’l referente, pero ye bono pal movimientu soberanista en xeneral y pal xorrecer d’una concenxa nacional.
Por ciertu, diba roblar como anónimu, pero como llevo xunta otros el blogue la campaña les cuenques salió asina foi un despiste. El blogue nun se responsabiliza d’esa opinión, yá que na campaña hai xente que caun tendrá’l so criteriu ya opinión. Hasta algunos nun son d’izquierda nacionaliega… polo menos militante, amás de que’l blogue llevenlo delles persones.
( Xosé A Glez ).
Gustaríame lleer l’artículu, pero la combinación de color del testu y del fondu máncame los güeyos. ¿Nun hai manera camudala ho? (escureciendo’l testu).
Bones llector,pues lleelu en Glayíu
De toles maneres miraré pa camudar la fonte.Salú!
@Xose,suel pasar col nireblog hehe.Respecto a lo que comentes,nel tema de CA quería dexar claro qu’independientemente de los resultaos paezme la opción más afayaíza a nivel de conceyu pal nuesu movimientu,anque como dices quiciabes hai que pensar en centrar esfuerzos nos conceyos y nun participar direutamente nes autonómiques,pero sobre too ye importante intentar coordinanos y nun solapanos unos a otros n’aquellos llugares onde tenga presencia más d’una organización.
salú!
Mui d’alcuerdu con cásique too. Tamién andamos pel mio blogue comentando cómo anda l’asuntu.
Un abrazu